Фаъолияти гурӯҳи кории ислоҳоти соҳаи кишоварзӣ

Душанбе, 12.12.2014. (АМИТ «Ховар», Зарангези Латиф).- Вазири кишоварзии Ҷумҳурии Тоҷикистон Қосим Роҳбар дар бораи «Фаъолияти гурӯҳи корӣ оид ба ислоҳоти соҳаи кишоварзӣ ва роҳҳои минбаъдаи ҳамкориҳо дар соҳаи ислоҳоти кишоварзӣ» дирӯз дар ҷаласаи васеъ таҳти роҳбарии муовини Сарвазири Ҷумҳурии Тоҷикистон Муродалӣ Алимардон дар мавзӯи «Ҷараёни иҷрои барномаи ислоҳоти кишоварзии Ҷумҳурии Тоҷикистон барои солҳои 2012-2020» сухан гуфт. Қосим Роҳбар дар доираи панҷ афзалияти татбиқшаванда: — диверсификатсия, ислоҳоти хоҷагиҳои кишоварзӣ, рушди кооперативҳо, ислоҳоти сохторӣ ва ташкили хизматрасонии машваратӣ пешниҳодҳои мушаххас намуд. Ҳамчунин намояндаи Созмони озуқа ва кишоварзӣ (ФАО) дар Тоҷикистон Виорел Гутсу оид ба ҳамкориҳои самарабахш баҳри амалигардонии ислоҳоти соҳаи кишоварзӣ, раиси Кумитаи давлатӣ оид ба идораи замин ва геодезии Ҷумҳурии Тоҷикистон Маҳмадтоир Зокиров дар бораи «Фаъолияти гурӯҳи корӣ оид ба ислоҳоти замин, роҳҳои минбаъдаи афзалиятнок баҳри татбиқи ислоҳоти замин» пешниҳодҳои мушаххас ироа намуданд. Зимни кори ҷаласа, дар доираи ҳамкориҳо бо Шарикони рушд, роҳҳои минбаъдаи рушди ислоҳоти кишоварзӣ, ислоҳоти замин, ислоҳоти бахши об, таҳияи механизми нави маблағгузории соҳаи кишоварзӣ, низоми идораи соҳаи кишоварзӣ ва таҳияи барномаи рушди иҷтимоии деҳот муайян гардиданд.