Хатлон: Мулоқотҳои судманд бо ҷавонон
Душанбе, 27.12.2014. (АМИТ «Ховар», Некрӯзи Муҳаммадсодиқ). -Дар доираи нақшаи чорабиниҳои Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон ҷиҳати баланд бардоштани маърифати сиёсиву ҳуқуқӣ, ташаккули ҳисси худшиносию ватандӯстӣ, даъвати ҷавонон ба сафи Қувваҳои мусаллаҳи ҷумҳурӣ ва инчунин эмин нигоҳ доштани наврасону ҷавонон аз шомилшавӣ ба ҳар гуна ҳизбу ҳаракатҳои иртиҷоӣ 26 декабри соли равон дар Қисми ҳарбии 2628-и Қӯшунҳои сарҳадии Кумитаи давлатии амнияти миллӣ дар вилояти Хатлон ва мақомоти иҷроияи ҳокимияти давлатии шаҳри Қурғонтеппа мулоқоти муовини якуми раиси кумита М. Муинӣ, муовини сардори Раёсати кор бо ҷавонони дастгоҳи марказӣ И. Мирзоев ва сардори Раёсати ҷавонон, варзиш ва сайёҳии вилояти Хатлон Фариза Абдуллоева бо сарбозон ва ҷавонони фаъоли шаҳр доир гардид.
Тавре ки ба АМИТ «Ховар» мутахассиси пешбари Бахши таҳлилу иттилооти кумита Наврӯз Қурбонов иттилоъ дод, дар мулоқот масъалаи ҳимояи марзу буми кишвар, эмин нигоҳ доштани истиқлолияти давлатӣ ва аз таҳдидҳои ҷаҳони муосир ҳифз намудани ҷавонону наврасон мавриди баррасӣ қарор гирифт.
Таъкид гардид, ки шомилшавии ҷавонон ба ҳар гуна ҳизбу ҳаракатҳои иртиҷоӣ метавонад ҳаёти осоиштаро халалдор намояд.
Масъулини кумита вобаста ба дастгириҳои Ҳукумати мамлакат нисбат ба ҷавонону наврасон ва сарбозон маърӯза намуда, ҷавононро ба хизмати содиқона ва саҳмгузорӣ дар рушду ободии кишвар даъват намуданд.
Дар фарҷом ба 8 нафар сарбози қисми ҳарбӣ туҳфаи хотиравӣ супорида шуд. Дар ҳамин радиф дар доираи Амалиёти “Биёед китоб мехонем!”, ки бо ибтикори Кумитаи ҷавонон, варзиш ва сайёҳӣ ҷараён дорад, ба қисми ҳарбии 2628-и Сарраёсати қӯшунҳои сарҳадӣ дар вилояти Хатлон 200 адад китоби гуногун барои мутолиа тақдим шуд.