Иқдоми хайрхоҳона барои Мактаб — интернати «Хирманак»
Душанбе, 25.12.2014. (АМИТ «Ховар», Кристина Эрлих).- Бо ибтикори ҳамсари сафири Ҷумҳурии Қазоқистон дар Ҷумҳурии Тоҷикистон Клара Смагулова 24 декабр дар арафаи Соли Нав дар Мактаб — интернати махсуси ҷумҳуриявии дорои тартиби махсус барои кӯдакони мубталои бемории полиомиелити «Хирманак» иқдоми хайрхоҳона роҳандозӣ шуд.
Дар ин маросим ҳамсари сафири Ҷумҳурии Қазоқистон дар Ҷумҳурии Тоҷикистон Клара Смагулова, ҳамсари сафири Федератсияи Русия дар Тоҷикистон Елена Лякина — Фролов, ҳамсари сафири Ҷумҳурии Ӯзбекистон дар Ҷумҳурии Тоҷикистон Ҷамила Шоисломова, ҳамсари мушовири калони Президенти ҶТ Алина Нодирова, муовини раиси Раёсати Ҷамъияти дӯстӣ ва равобити фарҳангии Тоҷикистон бо кишварҳои хориҷӣ Мушаррафа Шарифова ширкат доштанд.
Директори Мактаб — интернати махсуси ҷумҳуриявии «Хирманак» Наргис Муқимова ба меҳмонон барои иқдоми хайрхоҳона дар арафаи Соли Нав изҳори сипос карда, чунин гуфт: «Басо хуш аст, ки занони мо, ҳамсарони дипломатҳо, аз соли гузашта инҷониб барои аёдати кӯдакони мо ба ин ҷо меоянд. Мехоҳам аз ҷониби ҳамаи аъзои мактаб — интернат ва кӯдакон барои некхоҳии онҳо сидқан изҳори миннатдорӣ намоям».
Сипас ҳамсари сафири Ҷумҳурии Қазоқистон дар Ҷумҳурии Тоҷикистон Клара Смагулова ҳамаи кӯдакон, омӯзгорон ва ҳозиронро бо фарорасии Соли Нав муборакбод карда, ба кормандони мактаб — интернат дар фаъолияти наҷибонаашон муваффақиятҳо орзӯ намуд.
Ҳамсари сафири Федератсияи Русия дар Ҷумҳурии Тоҷикистон Елена Лякина — Фролова зимни суханрониаш тарбиягирандагони мактабро бо фарорасии Соли Нав муборакбод карда, ба омӯзгорони он барои меҳнати ҳалол ва меҳру муҳаббаташон нисбат ба кӯдакони ятим изҳори миннатдорӣ намуд.
Дар анҷоми иқдоми хайрхоҳона ҳамсари сафири Ҷумҳурии Қазоқистон дар Ҷумҳурии Тоҷикистон Клара Смагулова ба директори мактаб Наргис Муқимова ноутбуки асриро тақдим кард.
Ёдовар мешавем, ки то имрӯз дар Мактаб — интернати махсуси ҷумҳуриявии дорои тартиби махсус барои кӯдакони мубталои бемории полиомиелити «Хирманак» 325 нафар кӯдакон зиндагӣ ва таҳсил менамоянд. Дар ҳошияи иқдоми хайрхоҳона ба ҳамаи кӯдакони мактаб тӯҳфаҳои солинавӣ супурда шуданд, ки маблағи умумии онҳо беш аз 3 ҳазор доллари ИМА — ро ташкил медиҳад.