Иди «Вечёрка» барои кӯдакон

Душанбе,  22.12.2014. (АМИТ «Ховар»).- Бо  мадади Раёсати  савдои  пойтахт рӯзномаи «Вечёрка» ва Маркази  фарҳанги  «Аржанг» дар  Хона — интернати рақами  1 — и  шаҳри  Душанбе иди солинавӣ  ташкил  карданд. 
Раиси  пойтахт Маҳмадсаид  Убайдуллоев  дар ҷараёни яке  аз  машваратҳо  гуфта  буд, ки  сохторҳои  шаҳр  дар  арафаи Соли  нав  ба табақаҳои  камбизоати  аҳолӣ  дасти  ёрӣ дароз  мекунанд.
Дар  ҷараёни  иди  солинавӣ бо иштироки ҳунарпешагони Театри  опера  ва  балети  ба номи  С. Айнӣ ба  кӯдакон  барномаи мусиқии  театрӣ  намоиш дода,  сипас ба онҳо  тӯхфаю бозичаҳо тақдим  карда шуданд. 
«Кӯдакон ва  хусусан ятимоне, ки  дар интернатҳо зиндагӣ  мекунанд, ҳар  сол интизори  наздашон омадани падару  модар мешаванд. Бинобар  ин  мо тасмим  гирифтем, ки дар  ин рӯзҳои  фасли  зимистон онҳоро  шод  гардонем», —  гуфт  яке  аз  созмондиҳандагони  ин  чорабинӣ,  сармуҳаррири  рӯзномаи  «Вечёрка»  Гулнора  Амиршоева.
«Мехоҳам ба  ихтиёриёни  Созмони  ҷамъиятии «Даст ба даст»,  ҳамчунин кормандони  интернат, ки  нисбат ба  ятимон  ғамхору  мушфиқанд,  барои   меҳнати  душвору   диловаронаашон як ҷаҳон ташаккур  гӯям», — афзуд Гулнора  Амиршоева.