Кишти зироати кишоварзӣ 101 фоиз иҷро шуд

Душанбе, 25.12.2014. (АМИТ «Ховар», Зарангези Латиф).- Бинобар маълумотҳои фаврии раёсати растанипарварии Вазорати кишоварзӣ тибқи дурнамо имсол дар ҷумҳурӣ дар майдони 185142 гектар кишти тирамоҳӣ ва барвақтии зироатҳои кишоварзӣ гузаронида мешавад.
Ҳафтаи равон дар ҷумҳурӣ дар майдони беш аз 187051,3 гектар кишти тирамоҳӣ ва барвақтии зироатҳои кишоварзӣ гузаронида шуд, ки баробари 101 фоизи дурнамо мебошад. Ин нишондод нисбат ба ҳамин давраи соли гузашта 14961 гектар зиёд аст.
Дурнамои кишти зироатҳои ғалладонагӣ майдони 172515 гектарро ташкил медиҳад ва ҳафтаи ҷорӣ дар майдони зиёда аз 178,5 ҳазор гектар кишт гузаронида шуд, ки баробари 103,5 фоизи дурнамо буда, нисбат ба ҳамин давраи соли гузашта 12,9 ҳазор гектар зиёд аст.
Тибқи дурнамо имсол дар ҷумҳурӣ дар майдони 10527 гектар кишти пиёзи тирамоҳӣ гузаронида мешавад. 
Дар майдони 7377,3 гектар пиёзи тирамоҳӣ кишт шудааст, ки баробари 70,1 фоизи дурнамо буда, нисбат ба ҳамин давраи соли гузашта 14,6 ҳазор гектар зиёд аст.