Конибодом: ҷамъбасти рӯзҳои раёсати маориф

Душанбе, 2.12.2014. (АМИТ «Ховар», Ситораи Боймурод).- Дирӯз дар мақомоти иҷроияи ҳокимияти давлатии шаҳри Конибодом бо иштироки  директорони мактабҳои таҳсилоти умумӣ ва мудирони кӯдакистонҳо  Рӯзҳои раёсати маорифи вилоят дар муассисаҳои таълимии шаҳр  ҷамъбаст гардид.
Тавре ки дар ин бора хадамоти матбуоти раиси вилояти Суғд хабар додааст, зимни  ҷамъбаст кормандони масъули раёсати маорифи вилоят доир ба натиҷаи  сатҳи дониши хонандагон ва ҳолати таълиму тарбия дар 15 мактаби шаҳр ва 5 кӯдакистони омӯхташуда,  ҷараёни татбиқи санадҳои меъёрии ҳуқуқии соҳа, беҳтар намудани  сифати корҳои тарбиявӣ дар баӣни хонандагону тарбиятгирандагон, ташкили курсҳои омодагии хатмкунандагони мактабҳои таҳсилоти  миёна барои дохилшавӣ ба мактабҳои олӣ тибқи низоми нав, омодагӣ ба давраи зимистон, риояи либоси ягонаи мактабӣ сухан гуфтанд.
Муовини раиси шаҳр  Бурҳониддин Ҷабборӣ ва муовини сардори раёсати маорифи вилоят Сайфулло Раҳматов ба роҳбарони муассисаҳои таълимӣ  барои ислоҳи камбудиҳои ҷойдошта ва баланд бардоштани сатҳу сифати таълиму тарбияи хонандагон супоришҳои қатъӣ доданд.