«Коршиноси иқтисодӣ»-маҳфили илмӣ

 
Душанбе, 9.12.2014. (АМИТ «Ховар», Раъно Нусратуллозода).-Маҳфили навбатии илмӣ-амалии «Коршиноси иқтисодӣ», ки дар Донишкадаи молия ва иқтисоди Тоҷикистон доир гардид, масъалаҳои ниҳодии пайдоиши рентаи сиёсӣ, сабаб ва оқибатҳо, роҳҳои пешгирии он тавассути механизми иқтисодӣ дар партави татбиқи Қонуни Ҷумҳурии Тоҷикистон «Дар бораи коррупсия» ва Стратегияи давлатии мубориза ва муқовимат бо коррупсияро мавриди баҳсу мунозираи илмӣ қарор дод.
Ректори донишкада Ашурбой Солиев зикр кард, ки дар шароити ҳозира Ҷумҳурии Тоҷикистон марҳилаи сифатан нави созандагию ободкориҳоро мегузаронад. Дар ин самт саҳми илм ва пайгирӣ аз навигариҳои илмию пажуҳишӣ барои ҳалли муаммоҳои ҷойдошта, муваффақ шудан дар татбиқи ҳадафҳои стратегии рушди иқтисоди миллӣ омилҳои таъсирбахш шуда метавонанд. Мубрам будани ин масъаларо ба эътибор гирифта, донишкадаи мо низ дар ҳалли масъалаҳои фундаменталӣ, аз қабили иқтисоди сиёсии нав бояд барои низоми сифатан нави рушди макроиқтисодии кишвар саҳмгузорӣ намояд, илова намуд мавсуф.
Дар маҳфил маърӯзаи муовини директори Институти иқтисодиёт ва демографияи АИ ҶТ, профессор Аброр Мирсаидов дар мавзӯи «Рентаи сиёсӣ: табиат ва шаклҳои зуҳуроти он (иқтисоди сиёсии нав)» шунида шуд. Дар ҷараёни мубоҳиса байни иштирокчиёни маҳфил музокирот ба амал омад.