Медалҳои боксчиёни тоҷик барои дарёфти Ҷоми ҷаҳон
Душанбе, 11.12.2014. (АМИТ «Ховар»).- Варзишгарони Тоҷикистон дар мусобиқоти боксчиён байни кишварҳои истихроҷкунандаи нафт ба хотири ёдбуди Қаҳрамони Меҳнати Сотсиалистӣ Фармон Салмонов барои дарёфти Ҷоми ҷаҳон, ки аз 4 то 7 декабр дар шаҳри Белоярски округи мухтори Ханти — Мансии Русия баргузор гардид, ду медал ба даст оварданд.Тавре ки аз Кумитаи миллии олимпии ҶТ хабар доданд, дар мусобиқот беш аз 120 нафар варзишгарони 18 кишвари Осиё ва Аврупо аз қабили Озарбойҷон, Арманистон, Беларус, Қазоқистон, Чин, Қирғизистон, Латвия, Литва, Молдова, Муғулистон, Лаҳистон, Русия, Сербия, Тоҷикистон, Ӯзбекистон, Украина, Чехия, Шветсия иштирок доштанд. Шавкатҷон Раҳимов дар вазни то 64 килограмм бар варзишгари Русия Авак Узлян ва намояндаи Озарбойҷон Салмон Иброҳимов пирӯз шуда, дар вохӯрии ниҳоӣ барои дарёфти медали тиллоӣ аз боксчии Ӯзбекистон Шаҳром Ғиёсов шикаст хӯрд. Меҳроҷиддин Каримов дар вазни беш аз 91 килограмм варзишгари Литва Александрас Барановасро мағлуб сохта, дар вохӯрӣ бо варзишгари Ӯзбекистон Баҳодур Ҷалолов худаш мағлуб гардида, соҳиби медали биринҷӣ шуд. Ҷоизи медали биринҷӣ дар Бозиҳои олимпии Лондон Мавзуна Чориева дар вазни то 60 килограмм вохӯриро ба варзишгари Русия Даря Абрамова бо ҳисоби 0:3 бохта, аз вохӯриҳои минбаъда маҳрум шуд.