Муҳоҷирон қарзашонро гирифтанд

Душанбе,  12.12.2014. (АМИТ «Ховар»,  Лайло  Тоирӣ).- Бо  мадади   намояндагии  Вазорати  меҳнат,  муҳоҷират  ва  шуғли  аҳолии  ҶТ  дар  ФР  оид ба  муҳоҷират тайи  даҳ  рӯзи  моҳи  декабр  қарзи маоши  муҳоҷирони  меҳнатӣ  иборат  аз 6  миллиону  42  ҳазор  рубл  пардохта  шуд.
Мувофиқи  маълумоти   котиби  матбуоти  намояндагии Хадамоти  муҳоҷирати  ҶТ дар  ФР  Иброҳим  Аҳмадов, 4 декабр  сокини   шаҳри  Норак Сайдамрулло Бобохонов  аз  номи 25  нафар  сохтмончиёни  тоҷик ба намояндагӣ  муроҷиат  намуд. Ба  гуфтаи  номбурда  ширкати сохтмонии  «Аффект», ки дар  он  сохтмончиёни  тоҷик кор  мекарданд, маблағи  маошашонро  иборат  аз  962  ҳазор  рубл   нагирифтаанд. 
«Баъди  муроҷиати  намояндагӣ  ва  суҳбат  бо  роҳбарияти  ширкат ин  қазия   ба  таври  мусбат ҳал  шуд. Сокини  ноҳияи  Ҷалолиддин  Румии   вилояти  Хатлон  Азимова  Инобат Қаюмовна, ки  дар   ширкати «Чистий  свет»   кор  мекард,  бо  мусоидати  намояндагӣ  қарзи  маошашро  дар  ҳаҷми 300  ҳазор  рубл  гирифт», —  афзуд  Иброҳим  Аҳмадов.
Сокини  ноҳияи  Қубодиён  Исломиддин  Мусулмонов  низ баъди  муроҷиат  ба  намояндагӣ қарзи  маошаш  иборат  аз  200  ҳазор  рублро  аз  ширкати «ЭНКА» ба  даст овард.
Тавре  ки  қаблан   хабар  дода  шуда буд,  бо  мусоидати  корманди   намояндагӣ  ба   сохтмончиёни тоҷики  шаҳри  Санкт — Петербург 4  миллион  рубли  қарзашон   пардохта  шуд.