Мусобиқаи кушоди волейбол дар ноҳияи Румӣ
Душанбе, 23.12.2014. (АМИТ “Ховар”, Рафоати Абдулҳамид).- Чанде қабл дар майдони варзишии муассисаи таҳсилоти миёнаи умумии №34- и деҳаи дӯстии ҷамоати деҳоти Навободи ноҳияи Ҷ.Румӣ бо ибтикори бахши ҷавонон, варзиш ва сайёҳии ноҳия мусобиқаи кушод оид ба волейбол баргузор гардид. Мусобиқа ду рӯз идома ёфта, дар он зиёда аз 8 даста, инчунин аз ноҳияҳои тобеи марказ дастаҳои волейболбозон иштирок намуданд.
Бо сабаби зиёд будани дастаҳо мусобиқа дар ду майдон сурат гирифт. Мавриди зикр аст, ки ҷараёни мусобиқаи мазкурро ҳаводорону мухлисони зиёди ин намуди варзиш тамошо намуда, дастаҳои худро дастгирӣ намуданд. Ин аз он шаҳодат медиҳад, ки волейбол низ дар байни мардум оммавияти зиёд касб намудааст. Дар охири мусобиқа дастаи волейболбозони ноҳияи Ҷ. Румӣ бо дастаи ноҳияи Қумсангир байни ҳам рақобат намуда, ба даври ниҳоӣ роҳ ёфтанд. Дастаи волейболбозони ноҳияи Қумсангир сазовори ҷои аввал ва ҷом, ндастаи ноҳияи Румӣ ҷои дуюм ва дастаи ноҳияи Панҷ зинаи сеюмро ишғол намуда, бо ифтихорнома ва туҳфаҳои сарпарастони мусобиқа сарфароз гардиданд.