Нақшаҳои ҷадиди таълимӣ рӯйи кор меоянд

Душанбе, 15.12.2014. (АМИТ «Ховар», Раъно Нусратуллозода).-Нақшаҳои таълимии факултаҳои ДДХ ба номи академик Б. Ғафуров мавриди таҷдид ва навсозӣ қарор гирифта, факултаҳои забонҳои хориҷӣ, филология, таърих ва ҳуқуқ, рассомӣ,  графикӣ, тарбияи ҷисмонӣ, математика ва педагогӣ  нақшаҳои нави худро муаррифӣ намуданд.
Дар ин бора сардори Раёсати таълими донишгоҳ Саидқаҳҳор Ёқубов иттилоъ дода афзуд, ки  ҳанӯз дар нимаи дуюми моҳи сентябри соли ҷорӣ дар ҷаласаи мушовараи Вазорати маориф ва илми Ҷумҳурии Тоҷикистон меъёрҳои давлатии ихтисосҳои донишгоҳ баррасӣ ва тасдиқ шуданд. Давраи дуюми ин маъракаи муҳими мутобиқ гардонидани ҳуҷҷатҳои расмии меъёрии раванди таълим ба низоми кредитии таҳсилот, ки  коркард, таҳия ва тасдиқи нақшаҳои нави  таълимии ҳамаи 73 ихтисоси донишгоҳ ба ҳисоб меравад, ҷараён дорад.
Мақсади асосии аз нав таҳия намудани нақшаҳои таълимии нав- ин мутобиқгардонии онҳо бо низоми кредитии таҳсилот дар баробари фанҳои гуманитарию ҷамъиятӣ додани афзалият ба фанҳои тахассусӣ, ҷудо намудани меъёри зиёди вақти донишҷӯ барои кори мустақилона ва ғайра мебошад. 
Зикр шуд, ки дар нақшаҳои таълимии нав пай дар пайи фанҳои омӯхташаванда чунон бояд гузошта шавад, ки ҳар як давраи минбаъда барои ташаккул ва ба як низоми пурра даромадани омӯзиши хуби маводи таълимиро таъмин намояд.
 Сарчашма иттилоъ дод, ки раванди пешниҳоди нақшаҳои таълимии нав аз ҷониби факултаҳо идома дорад ва давраи якуми он 15 декабр ба анҷом мерасад. Баъд аз коркард ва хулосабарориҳо дар Раёсати таълими донишгоҳ он барои мувофиқа ва тасдиқ ба Вазорати маориф ва илми Ҷумҳурии Тоҷикистон манзур мешавад.
Интизорӣ меравад, ки нақшаҳои ҷадиди таълимӣ шурӯъ аз соли хониши 2015-2016 мавриди амал қарор мегиранд.