Нақши ВАО дар тарғиби сиёсати давлатии ҷавонон
Душанбе 23.12.2014 (АМИТ «АМИТ «Ховар», Фарзонаи Давлат).- Имрӯз дар толори КВД «Маркази фарҳангии ҷавонон «Ориёно» бо ташаббуси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон дар мавзӯи “Нақши ВАО дар тарғибу ташвиқи сиёсати давлатии ҷавонон” мизи мудаввари телевизионӣ доир гардид, ки дар он намояндагони васоити ахбори оммаи чопию электронӣ, хонандагон ва донишҷӯёни макотиби олӣ иштирок намуданд.
Ҳадафи чорабиниро масъулин дар тарғибу ташвиқи кори соҳа дар ВАО, бештар фаро гирифтани ҷавонон бо иттилоот, мустаҳкам намудани ҳамкорӣ миёни расонаҳо ва Кумитаи ҷавонон, варзиш ва сайёҳӣ арзёбӣ намуданд.
Дар мизи мудаввар муовини раиси Кумитаи ҷавонон, варзиш ва сайёҳӣ Қиёмиддин Миралиев нақши ВАО-ро дар ҷомеа муҳим хонда, иштирокдоронро ба инъикоси саривақтӣ ва беғаразонаи ҳаводиси муҳими ҷомеа даъват намуда, гуфт: “Агар ба таҷрибаи ҷаҳонӣ назар афканем, дар бисёр кишварҳо нисбат ба рӯзноманигорон таваҷҷуҳ хеле зиёд аст, зеро вазифаи рӯзноманигор на танҳо иттилоъ додан, балки мусоидат кардан ба беҳдошти вазъи ногувори баамаломада мебошад”.
Дар мизи мудаввар масъулин иброз дошанд, ки яке аз самтҳои асосии фаъолияти Кумитаи ҷавонон, варзиш ва сайёҳӣ татбиқи сиёсати давлатии ҷавонон ба ҳисоб меравад. Барои дар сатҳи баланд иҷро гардидани ин ҳадаф нақши ВАО-и кишвар бағоят калон мебошад. Аз ин рӯ, бо баргузор намудани чунин мизҳои мудаввар имкон пайдо мегардад, ки намояндагони расонаҳои чопию электронии кишвар андешаҳои хешро роҷеъ ба боз ҳам васеъ инъикос намудани ин ҳадафи муҳим иброз намоянд.
Бо ин мақсад дар мизи мудаввар рӯзноманигорон аз шабакаҳои телевизионӣ ва радиоӣ, намояндагони матбуоти даврӣ ва донишҷӯёни риштаи рӯзноманигорӣ ширкат намуда, бевосита андешаҳои худро бобати чӣ гуна инъикос намудани фаъолияти Кумитаи ҷавонон, варзиш ва сайёҳӣ баён доштанд.