Намоиши китобҳои тозанашр дар КМТ

Душанбе, 16.12.2014. (АМИТ «Ховар», Зарангези Латиф).- Бо ибтикори шуъбаи тарғиб ва баргузории чорабиниҳои фарҳангии Китобхонаи миллии Тоҷикистон (КМТ) намоиши китобҳои тозанашр, ки аз фаъолияти оғози китобхонаи миллӣ бо ибтикори кормандони китобхона нашр гардидаанд, баргузор шуд. Дар намоиши китобҳо наздик ба 40 адад китоби тозанашр, аз қабили “Тарҷумаи тафсири Табарӣ”, “Асосҳои донишҳои китобдорӣ ва библиографӣ”, “Осорхонаи Тоҷикистон дар даврони истиқлол”, “Андӯхти рӯзгор”, Осорномаи С. Табаров”, «Осорномаи профессор Худойназар Асозода» ва «Тоҷнома» дар 3 ҷилд ба намоиш гузошта шуд.Китоби якуми ин силсила «Авасто»-ро дар бар мегирад, ки бо пешгуфтори Президенти кишвар муҳтарам Эмомалӣ Раҳмон шурўъ шуда, бо харитаҳо поён меёбад, ки дар умум 838 саҳифаро дар бар мегирад.Китоби дуввум «Мероси хаттии бостон» ном дошта, дар бораи адабиёти паҳлавӣ сухан меравад, ки бо сухани мудири Маркази тоҷикшиносии Китобхонаи миллии Тоҷикистон Назри Яздонӣ ва пешгуфтори узви вобастаи Академияи илмҳои Ҷумҳурии Тоҷикистон, Додихудо Саймиддинов оғоз шуда, бо харитаҳо анҷом меёбад ва дар ҷамъ 477 саҳифаро дар бар мегирад.Китоби севвум «Тоҷнома, силсилаи тоҷикон дар масири тамаддун, Абўмансур Абдулмалик ибни Муҳаммади Саолабии Нишопурӣ, Таърихи ғурр- ус-сияр маъруф ба «Шоҳнома»-и Саолабӣ» ном дошта, бо пешгуфтори нависанда оғоз шуда, бо феҳристи номҳо анҷом меёбад, ки дарбаргирандаи 394 саҳифа мебошад.