Нашъамандӣ-таҳдид ба ояндаи ҷомеа
Душанбе,16.12.2014.(АМИТ «Ховар», Раъно Нусратуллозода).-Бо ибтикори Маркази дастгирии донишҷӯёни Донишгоҳи давлатии омӯзгории Тоҷикистон (ДДОТ) ба номи С.Айнӣ таҳти унвони «Нашъамандӣ, зарари маводи нашъаовар ба ҷавонон, таҳдид ба ояндаи ҷомеа» конфронси илмӣ-назариявӣ доир гардид, ки дар он нозири калони шуъбаи назорати муомилоти маводи нашъаовар ва пешгирии нашъамандӣ дар назди Агентии назорати маводи нашъаовари назди Президенти Ҷумҳурии Тоҷикистон Фирдавс Рӯзиев ширкат варзид. Тавре ки сухангӯи ДДОТ Бахтиёри Абдураҳим иттилоъ дод, муовини ректор оид ба корҳои илмӣ Абдусамад Муллоев нашъамандиро вабои аср номида, ҷавононро ҳушдор дод, ки аз ин гуна маводи марговар худро канор гиранд.Дар конфронс зикр гардид, ки нашъа ва нашъамандӣ аз масоили мубрами ҷомеа мебошанд ва оқибати нашъамандӣ, бешак, марг аст. Боиси хушҳолист, ки вақтҳои охир ҷавонон хавфу хатари маводи нашъаоварро ба ҷони хеш бештар дарк намуда, мекӯшанд, ки ба доми ин вабо гирифтор нагарданд. Дар идомаи ҷамъомад Фирдавс Рӯзиев низ паёмадҳои фоҷиабори «марги сафед»-ро хотирнишон намуда, аз донишҷӯён хост, ки аз он на танҳо худро канор гиранд, балки дар тарғиби ҳаёти солим миёни ҳамкурсону атрофиён саҳмгузор шаванд.