Нишасти ширкатҳои туристии Тоҷикистон
Душанбе, 03.12.2014 (АМИТ “Ховар”, Фарзонаи Давлат).-Имрўз дар шаҳри Душанбе нишасти ширкатҳои туристии Тоҷикистон ва масъулини донишгоҳу донишкадаҳои олии мамлакат, ки донишҷўёнро дар риштаи туризм омода менамоянд, бо муовини раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Руслан Шадиков баргузор гардид. Зимни нишасти мазкур масъалаи имкониятҳои ширкатҳои сайёҳии ватанӣ барои ҷалби ҳарчи бештари сайёҳон аз давлати Малайзия ва Қувейт ҳамоҳанг шуда, имкониятҳои туристии Ҷумҳурии Тоҷикистон дар Намоишгоҳи байналмилалии ITB Берлин — 2015 тарҳрезӣ мегарданд.Ҳамзамон кумита ба донишгоҳу донишкадаҳои олии мамлакат, ки донишҷўёнро дар риштаи туризм омода менамоянд, 3333 адад китоби дарсии соҳаи туризм, аз қабили “Туризми фарҳангӣ”, “Маҷмўи санадҳои меъёрии ҳуқуқии соҳаи туризм”, “Туризм дар Ҷумҳурии Тоҷикистон” ва “Ташкили технологияи хизматрасонӣ дар меҳмонхонаҳо”-ро туҳфа намуд. Ин дар ҳолест, ки рўзи 28 ноябри соли ҷорӣ дар маҷлиси навбатии Ҳукумати Ҷумҳурии Тоҷикистон “Барномаи рушди туризм барои солҳои 2015 — 2017” қабул гардид, ки он ба рушди ин соҳа такони ҷиддӣ ҳоҳад бахшид.