Обтаъминкунии устувор ва санитария дар Тоҷикистон
Душанбе, 10.12.2014. (АМИТ «Ховар», Кристина Эрлих).- Имрӯз, 10 декабр, дар шаҳри Душанбе ҷаласаи навбатии Шабакаи созмонҳои шарики бахши обтаъминкунии устувор ва санитария дар Тоҷикистон баргузор мегардад. Ин чорабиниро дафтари Оксфам дар ҳошияи лоиҳаи «Обтаъминкунӣ ва санитария дар Тоҷикистон» роҳандозӣ менамояд. Барномаи мазкурро Агентии рушду ҳамкории Шветсария маблағғузорӣ намуда ва он зимни ҳамкорӣ бо Ҳукумати Ҷумҳурии Тоҷикистон ва Барномаи рушди СММ дар амал татбиқ карда мешавад.
Тавре ки аз Намояндаи Оксфам дар Тоҷикистон ба АМИТ «Ховар» хабар доданд, дар ҷараёни ҷаласа таҷрибаи роҳандозии сиёсат дар бахши санитария дар мактабҳои деҳоти Тоҷикистон ва барномаҳои оид ба санитария ва беҳдошт дар Тоҷикистон баррасӣ мешаванд.
Ёдовар мешавем, ки Ҷумҳурии Тоҷикистон ба ҳайси 20 кишвари истифодабарандаи барномаи мазкур интихоб шудааст. Мақсад аз ин барнома беҳдошти дастрасии аҳолӣ ба оби бехатар ва хидматрасонии санитарӣ, беҳбуди тандурустӣ ва таҳсилот, афзун намудани ҳуқуқу имкониятҳои занону ҷавонон ва дастгирии тарзи фаъолу солими зиндагӣ мебошад.