“Омӯзгори соли Тоҷикистон 2014”-даври ниҳоӣ

Душанбе, 23.12.2014. (АМИТ «Ховар», Зарангези Латиф).- Даври ниҳоии озмуни “Омӯзгори соли Тоҷикистон 2014”, чанде қабл дар   Донишкадаи ҷумҳуриявии такмили ихтисос ва бозомўзии кормандони соҳаи маориф баргузор гардид. Дар ҷамъомад вазири маориф ва илми ҷумҳурӣ Нуриддин Саид иштирок кард. Озмуни “Омӯзгори соли Тоҷикистон 2014” аз рўйи 7 шарт: дарси конкурсӣ аз рўйи ихтисос (45 дақиқа), муаррифии таҷрибаи корӣ (дар доираи 20 дақиқа) соати тарбиявӣ (20дақиқа), таҳлили дарс (10 дақиқа), маҷлиси падару модарон  (дар доираи 20 дақиқа), ҷавоби дуруст додан ба 10 (даҳ) савол ва кор бо компютер   гузаронида шуд. Дар интиҳои озмун ғолибон аз тарафи доварон муайян гардида, Саида Ғаффорова  дар озмуни «Муаллими сол»-и ҷумҳуриявӣ ғолиб дониста шуд. Ба ғолиби озмуни имсола-  Саида Ғаффорова аз ҷониби вазири маориф ва илми ҷумҳурӣ Нуриддин  Саид  мукофоти  пулӣ ба маблағи (8000 сомонӣ) ва аз ҳисоби Кумитаи иттифоқи касабаи маориф ва илми кишвар 1000 сомонӣ ҳадя гардид. Инчунин ба 4 нафар иштирокдори озмун аз тарафи Вазорати маориф ва илми кишвар як ададӣ компютер бо мукофоти пулӣ эҳдо гардид,   3 нафар бо нишони «Аълочии маорифи Тоҷикистон»  ва 2 нафар бо Ифтихорномаи Вазорати маориф ва илм қадрдонӣ шуд.