Пайравӣ ба ниёгон: “Падармурдаро соя бар сар фикан…”

Душанбе, 30.12.2014. (АМИТ «Ховар»).-Кумита оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон сарпарастии мактаб — интернати №4 деҳаи Ширинчашмаи ноҳияи Тоҷикободро ба уҳда дорад ва дар арафаи ҷашнҳои милливу динӣ ба ин мактаб-интернат дасти кумак дароз менамояд. 
Дар партави ташаббус ва ғамхориҳои Президенти кишвар муҳтарам Эмомалӣ Раҳмон ба ятимону ниёзмандон ин навбат низ дар арафаи истиқбол аз соли нави 2015 кумита ба тарбиятгирандагони  мактаб-интернати мазкур кумакҳои ғизоӣ дар намуди орд, шакар, биринҷ, гӯшт, анвои шириниҳо, инчунин либоси зимистона тақдим намуд. 
Маврид ба зикр аст, ки имсол кумита барои толибилмони мактаб-интернат хобгоҳи замонавӣ ва муҷаҳҳаз бо тамоми шароити лозимиро  мавриди истифода қарор дод. 
Дар мактаб-интернати №4 деҳаи Ширинчашмаи ноҳияи Тоҷикобод 41 нафар ятим ва хонанда аз оилаҳои ниёзманд ба таҳсил фаро гирифта шудааст.