Пешгирӣ аз истифодаи маводи тиракунандаи ақл

Душанбе, 16. 12.2014. (АМИТ «Ховар», Муқаддас Темурзода).-Бо мақсади пешгирии нашъамандӣ ва нашъаҷаллобӣ дар байни ҷавонон кормандони Агентии назорати маводи нашъаовари назди Президенти ҶТ бо устодон ва донишҷӯёни Донишкадаи давлатии забонҳои ба номи Сотим Улуғзодаи шаҳри Душанбе вохӯрӣ доир намуданд.Назар ба иттилои маркази матбуоти АНМН, вохӯрии мазкур дар муҳити ошкоро ва ба таври суҳбат баргузор гардид, ки дар он бештар масъалаҳои беҳудагардии ҷавонон, истифодаи маводи тиракунандаи ақл, аз қабили нос, сигор, машруботи спиртӣ, маводи нашъадор, даст задани духтарон ба корҳои ношоиста, ҳузури донишҷӯён дар марказҳои дилхушӣ, бемориҳои сироятӣ ва дигар амалҳои номатлуб матраҳ гардиданд. Бояд зикр намуд, ки дар вохӯрӣ зиёда аз 200 нафар донишҷӯ фаъолона ширкат варзид.