Пирӯзии варзишгарони тоҷик дар Ҷоми ҷаҳонии бокс

Душанбе, 11.12.2014. (АМИТ “Ховар”, Ситораи Боймурод).-Варзишгарони тоҷик дар Ҷоми ҷаҳонии бокс, ки байни кишварҳои тавлиди нафт дар шаҳри Белоярскийи Ханти-Мансийски Русия баргузор шуд, як медали нуқра ва як медали биринҷӣ ба даст оварданд. 
Тавре ки дар ин бора Кумитаи миллии олимпии кишвар хабар додааст, дар ин мусобиқа, ки барои бори 12-ум ба хотираи аввалин кашшофи нафти Югорск Фармон Салмонов байни мардону занон сурат гирифт, 126 муштзан аз 18 кишвар (Арманистон, Беларус, Қазоқистон, Қирғизистон, Латвия, Литва, Молдова, Муғулистон, Озарбойҷон, Полша, Русия, Сербия, Тоҷикистон, Ӯзбекистан, Украина, Чехия, Чин, Шветсия) ширкат доштанд. Ба ҳайати тими мунтахаби Тоҷикистон панҷ мард — Файзмамад Малахбеков (52 кг), Анвар Юнусов (60 кг), Шавкатҷон Раҳимов (64 кг) , Ҷаҳон Қурбонов (91кг), Меҳроҷиддин Каримов (+91 кг) ва як зан — Мавзуна Чориева (60 кг) дохил буданд.
Муштзани тоҷик Шавкатҷон Раҳимов дар вазни то 64 кг баъди ду ғалаба бар Авак Узляни русиягӣ ва Салмон Иброҳимови озарбойҷонӣ  ба финал баромад. Вале ӯ дар қувваозмоии ниҳоӣ аз Шаҳром Ғиёсови ӯзбекистонӣ шикаст хӯрда, бо медали нуқра сарфароз гашт.
Варзишгари дигари тоҷик Меҳроҷиддин Каримов, ки бо лақаби «Гулливери тоҷик» маъруф аст, дар вазни беш аз 91 кг барои ба даври ниманиҳоӣ роҳ ёфтан бар Александрас Барановаси литовӣ  ғолиб омада, баъдан аз Баҳодур Ҷалолови ӯзбекистонӣ мағлуб шуда. бо медали биринҷӣ қаноат кард.
Гуфта мешавад, ки муштзанҳои тоҷик соли 2015 дар мусобиқоти қаҳрамонии ҷаҳон ва Осиё ширкат меварзанд. Инчунин онҳо барои дарёфти роҳхатҳо ба Бозиҳои тобистонаи олимпии соли 2016 дар Рио-де-Жанейрои Бразилия мубориза хоҳанд бурд.