Пирӯзии варзишгарони тоҷик дар Ҷоми «Хон Манас»

Душанбе, 26.12.2014. (АМИТ “Ховар”, Ситораи Боймурод).-Варзишгарони тоҷик дар мусобиқаи байналмилалии дзюдо барои Ҷоми «Хон Манас” дар Бишкек ҳашт медал (4 нуқра ва 4 биринҷӣ) ба даст оварданд. Тавре ки дар ин бора Кумитаи миллии олимпии кишвар хабар додааст, дар ин мусобиқаи анъанавӣ, ки барои бори панҷум барпо гардид, 180 нафар аз Афғонистон, Қазоқистон, Қирғизистон, Русия, Тоҷикистон ва Эрон ширкат доштанд. Дар он занон дар 7 вазн ва мардон дар 8 вазн рақобат карданд. Дар сабқати занона Мавлуда Саъдуллоева дар вазни 52 кг бо медали нуқра ва Фазилат Гулбоева дар вазни 57 кг бо медали биринҷӣ сарфароз гаштанд. Дар сабқати мардона Салмон Раҳмихудоев дар вазни 66 кг, Ҳамроҳ Раҷабов дар вазни 73 кг ва Ғиёсиддин Раҷабзода дар вазни 81 кг бо медалҳои нуқра мукофотонида шуданд. Се нафари дигар — Меҳроҷ Ғафуров дар вазни 60 кг, Рашиди Шодибек дар вазни 90 кг ва Рауф Зиёбеков дар вазни беш аз 90 кг барандагони медалҳои биринҷӣ гардиданд.