Рақибони дастаи ҷавонони Тоҷикистон маълум шуданд

Душанбе, 5.12.2014. (АМИТ “Ховар”, Ситораи Боймурод).- Дар қароргоҳи Конфедератсияи футболи Осиё дар шаҳри Куала-Лумпури Малайзия дирӯз қуръакашии даври интихобии мусобиқаи қаҳрамонии Осиё-2016 байни дастаҳои мунтахаби ҷавонони то 23-сола доир гардид.
Тавре ки дар ин бора сомонаи Кумитаи миллии олимпӣ хабар додааст, бар асоси қуръакашӣ тими мунтахаби Тоҷикистон дар гурӯҳи «D” бо тимҳои мунтахаби ҷавонони Имороти Муттаҳидаи Араб, Яман ва Шри-Ланка рақобат мекунад. Бозиҳои сабқати интихобӣ аз 23-юм то 31-уми марти соли оянда баргузор мешаванд. 
Гуфта мешавад, ки дар марҳилаи интихобӣ 43 даста ширкат меварзад. 
Мусобиқаи қаҳрамонии Осиё-2016 байни ҷавонон мусобиқаи интихобӣ барои роҳ ёфтан ба Бозиҳои олимпии соли 2016, ки дар Рио-де-Жанейрои Бразилия баргузор мешавад, маҳсуб мешавад. Ҷоизадорони қаҳрамонии ҷавонони Осиё ба Олимпиадаи соли 2016 роҳхат мегиранд.