Сафари расмии Абдул Рауф Иброҳимӣ ба Тоҷикистон

Душанбе, 2.12.2014. (АМИТ «Ховар», Мавҷуда Анварӣ).-   3-юми декабри соли ҷорӣ раиси Вулуси ҷиргаи Шӯрои миллии Ҷумҳурии Исломии Афғонистон Абдул Рауф Иброҳимӣ бо сафари расмӣ ба Ҷумҳурии Тоҷикистон ташриф меорад.
Дар назар аст, ки Абдул Рауф Иброҳимӣ зимни сафари серӯзаи худ ба Тоҷикистон бо Президенти Ҷумҳурии Тоҷикистон Эмомалӣ Раҳмон, раиси Маҷлиси намояндагони Маҷлиси Олӣ  Шукурҷон Зуҳуров, вазири адлия ва вазири корҳои дохилии кишвар мулоқот анҷом диҳад. 
Раиси Вулуси ҷиргаи Шӯрои миллии Ҷумҳурии Исломии Афғонистон аз Неругоҳи барқи обии  Норак, Маркази маъмурӣ ва тиҷоратии «Пойтахт-90» ва «Осорхонаи миллии Тоҷикистон» низ боздид ба амал хоҳад овард. 
Раиси Вулуси ҷиргаи Шӯрои миллии Ҷумҳурии Исломии Афғонистон Абдул Рауф Иброҳимӣ ҳамчун эҳтиром ба таъриху фарҳанги тоҷикон дар назди Маҷмааи Ваҳдати миллӣ ва эҳёи Тоҷикистон -муҷассамаи Исмоили Сомонӣ гулчанбар мегузорад.