Сайқалгаҳи ҳунару истеъдод

Ҳисор, 30.12.2014. (АМИТ “Ховар”, Ҳотами Шариф).- Таърихи таъсис, ташаккул ва саҳми бесобиқаи хонаҳои пионерӣ,  маркази эҷодии кӯдакону наврасон ва муасисаҳои таҳсилоти иловагӣ дар ноҳияи Ҳисор дар як ҳамоиши судманд мавриди баррасӣ ва қадрдонӣ қарор гирифт. Муовини раиси ноҳия Умеда Абдуллоева, директори  муассисаи таҳсилоти иловагӣ дар  назди  Вазорати маориф ва илми Ҷумҳурии Тоҷикистон Хол Холназаров, директори Маркази санъат ва  эҷодии  кӯдакон ба номи Парии  Ҳисорӣ Мирзомурод Боев, таърихнигор  Зафар Дӯстов, санъаткор Парвиз Пӯлодӣ дар бораи аҳамияти муассисаҳои  таҳсилоти иловагӣ, омӯзиши ҳунарҳои гуногун дар маҳфилҳо сухан гуфтанд.
Омӯзиши касбу ҳунарҳои гуногун, сайқал додани истеъдоди фитрии кӯдакону наврасон, муҳайё кардани шароити мусоид ва ҷалби наврасон ба маҳфилҳои омӯзишӣ аз  вазифаҳои муҳими муассисаҳои таҳсилоти иловагист. Гузаронидани чорабиниҳои фарҳангию шавқовар на танҳо руҳи наврасонро баланд мебардорад, балки онҳоро ба қуллаҳои баланди илму маърифат ва касбу ҳунар роҳнамоӣ месозад.