Сарвазири Покистон ҳукми қатлро эҳё кард

Душанбе,18.12.2014. (АМИТ «Ховар».-Иброҳими Ҳабибуллоҳ).- Мувофиқи иттилои шабакаи интернетии Би-Би-Си Сарвазири Покистон Навоз Шариф дирӯз намояндагони ҳамаи ҳизбҳои сиёсии Покистонро, ки дар порлумон ҳузур доранд, ба ҷаласаи фавқулода даъват намуд ва ҳукми нави қатлро барои парвандаҳои марбут ба терроризм ва экстремизм эҳё намуд. Гуфта мешавад, ки дар натиҷаи ҳамлаи марговар ба як мактаби шаҳри Пешовари Покистон зиёда аз 140 нафар кушта шудааст. Душанбе,18.12.2014. (АМИТ «Ховар»).-Мувофиқи иттилои шабакаи интернетии Итар Тасс дирӯз аз атрофи биёбони вилояти Дейр аз-Зори Сурия 230 ҷасад пайдо шудааст, ки 140-тоаш аз ҷавонони ноболиғ аст. Ба гуфти фаъолони ҳуқуқи башари мустақар дар Сурия ҷасадҳои дарёфтгардида эҳтимол аз қабилаи Шайтат бошанд, ки барои ҳимояи аҳлу байт ва макони хеш бар зидди ҷангҷӯёни ифротии «Давлати исломӣ» мубориза бурдаанд. Душанбе,18.12.2014. (АМИТ «Ховар»).-Мувофиқи иттилои Вазорати оид ба ҳуқуқи башари Ироқ, яке аз сарлашкарони гурӯҳи ифротгарои «Давлати исломӣ» Абу Анас ал-Либи ба қатли 150 нафар зан, ки дар миёни онҳо бонувони ҳомиладор ва духтарони ноболиғ низ ба чашм мерасид, дастури қатъӣ дод. Гуфта мешавад, ки ин фоҷеа дар шаҳри Ал-Фаллуҷ сар задааст. Қобили зикр аст, ки ҷангиёни гурӯҳи ифротгарои мазкур яке аз масҷидҳоро ба зиндони бузург табдил дода, дар он ҷо асиронро ба ранҷу шиканҷа мекашанд. Душанбе,18.12.2014. (АМИТ «Ховар»).- Тибқи иттилои Вазорати умури дохилаи Ҷумҳурии Исломии Афғонистон дар вилояти Бадахшони кишвар зимни роҳандозии амалиёти воҳидҳои низомии кишвар 13 силоҳбадасти ҳаракати «Толибон» маҳв шуда, 11 нафари дигар захмӣ гаштааст. Гуфта мешавад, ки амалиёти низомӣ муддати 4 рӯз аст, ки идома дорад. Аз террористон ба миқдори зиёд яроқу аслиҳа ва муҳимоти ҷангии дигар мусодира гардид. Душанбе,18.12.2014. (АМИТ «Ховар»).- Дирӯз бар асари садамаи мудҳиши нақлиётии автобуси мусофиркаш дар яке аз роҳҳои мошингарди штати Пиауи қисми шимолу шарқии Бразилия 7 нафар ба ҳалокат расида, 3 каси дигар ҷароҳати гуногуни ҷисмонӣ бардошт.