Соҳиби Ҷоми «Мегафон» муайян шуд

Душанбе, 23.12.2014. (АМИТ «Ховар», Зарангези Латиф).- Донишҷўёни Донишкадаи политехникии Донишгоҳи техникии Тоҷикистон дар шаҳри Хуҷанд дар мегафоруми “Мегафон-Тоҷикистон” иштирок намуда,  соҳиби Ҷоми ширкати мобилии «Мегафон» гардиданд. 
Гуфта мешавад, ки ширкати мобилии «Мегафон-Тоҷикистон» маротибаи чорум аст, ки дар ҳудуди вилояти Суғд мегафорумро миёни муассисаҳои олии вилоят доир менамояд. Мегафоруми имсола низ дар маҷлисгоҳи боҳашамати Донишкадаи политехникии Донишгоҳи техникии Тоҷикистон гузаронида шуда, дар он донишҷўёни 5 муассисаи олии вилоят, аз ҷумла Донишгоҳи давлатии Хуҷанд, Донишкадаи политехникии Донишгоҳи техникии Тоҷикистон, Донишгоҳи ҳуқуқ, бизнес ва сиёсати Тоҷикистон, Донишкадаи иқтисод ва савдо ва Донишкадаи кўҳӣ-металлургии шаҳри Чкалов дар мавзўи «Интернети оянда» лоиҳаҳои барномаи худро муаррифӣ намуданд.