Сохтори Маҷлиси миллӣ тағйир меёбад?
Душанбе, 24.12.2014.(АМИТ «Ховар», Марзия Саидзода).-Сохтори Маҷлиси миллӣ ё худ палатаи болоии Парлумони Тоҷикистон дар соли 2015 тағйир намеёбад ва дар маҷмӯъ шумораи кормандони он 52 нафарро ташкил хоҳад дод. Ин матлабро 24 декабр раиси Маҷлиси миллии Маҷлиси Олии ҷумҳурӣ Маҳмадсаид Убайдуллоев дар ҷараёни баргузории иҷлосияи бистуми Маҷлиси миллӣ дар Душанбе зикр кард.
Бояд тазаккур дод, ки 24 декбар аъзои Маҷлиси миллӣ дар радифи баррасӣ ва ҷонибдории нӯҳ масъалаи рӯзномаи иҷлосияи бистуми палатаи болоии Парлумон, инчунин тибқи Қарори Маҷлиси миллии Маҷлиси Олии Ҷумҳурии Тоҷикистон сохтор, рӯйхати вазифаҳо, шумораи кормандони дастгоҳи Маҷлиси миллии Маҷлиси Олии Ҷумҳурии Тоҷикистон ва нақшаи хароҷоти Маҷлиси миллии Маҷлиси Олии Ҷумҳурии Тоҷикистонро барои соли 2015 тасдиқ карданд.
Масъалаи мазкурро дар назди аъзои палатаи болоии Парлумони мамлакат Мизроб Кабиров -роҳбари дастгоҳи Маҷлиси миллӣ пешниҳод намуда, дар бораи ҷузъиёти он ба таври возеҳ гузориш надод.
Бояд зикр кард, ки Маҷлиси миллӣ — палатаи болоии Парлумони Тоҷикистон маҳсуб ёфта, соли 2000 таъсис шудааст. Он аз 33 аъзо иборат буда, 8 нафари он аз ҷониби Президенти кишвар таъйин шуда, боқимондааш аз ҷониби вакилони маҷлисҳои маҳаллии вакилони халқ ба муддати панҷ сол интихоб мешаванд. Инчунин Президенти нахустини Ҷумҳурии Тоҷикистон Каҳҳор Маҳкамов аъзои доимии Маҷлиси миллӣ мебошад. Интихоботи аъзои Маҷлиси миллӣ ё худ палатаи болоии Парлумони Тоҷикистон баъд аз 25 рӯзи баргузории интихоботи Маҷлиси намояндагон гузаронида мешавад. Тибқи Фармони Президенти кишвар Эмомалӣ Раҳмон интихоботи аъзои нави Маҷлиси миллӣ 27 марти соли 2015 таъйин шудааст.