Сохтори МН МО ҶТ барои соли 2015 тасдиқ мегардад

Душанбе, 3.12.2014.(АМИТ «Ховар», Марзия Саидзода).-Интизор меравад, ки имрӯз дар ҷаласаи навбатии иҷлосияи шашуми палатаи поёнии Парлумони мамлакат сохтор, рўйхати вазифаҳо ва нақшаи хароҷоти Маҷлиси намояндагони Маҷлиси Олии Ҷумҳурии Тоҷикистон барои соли 2015 баррасӣ ва тасдиқ шавад. Ҳамзамон доир ба иҷрои сметаи хароҷоти Маҷлиси намояндагони Маҷлиси Олии Ҷумҳурии Тоҷикистон барои соли 2014 дар назди вакилон роҳбари дастгоҳи Маҷлиси намояндагони Маҷлиси Олии ҷумҳурӣ Ҳамрохон Расулов гузориш хоҳад дод. Инчунин вакилони Парлумон лоиҳаи қонунҳои Ҷумҳурии Тоҷикистон «Дар бораи хизмати дипломатӣ», «Оид ба ворид намудани тағйирот ба Қонуни Ҷумҳурии Тоҷикистон «Дар бораи ҳуқуқи муаллиф ва ҳуқуқҳои вобаста ба он», „Дар бораи низоми иҷозатдиҳӣ“, «Дар бораи ворид намудани тағйирот ба Кодекси мурофиавии граждании Ҷумҳурии Тоҷикистон»-ро баррасӣ ва қабул хоҳанд кард. Дар ҷараёни ҷаласа Созишномаи грантӣ оид ба кумаки техникӣ байни Ҷумҳурии Тоҷикистон ва Бонки Исломии Рушд вобаста ба дастгирии Лоиҳаи «Пешгирии гузаштани ВИЧ/СПИД аз модар ба кӯдак дар Тоҷикистон» муҳокима шуда, ба тасвиб хоҳад расид.