«Суруди сол»-озмуни ҷумҳуриявӣ

Душанбе, 25.12.2014. (АМИТ «Ховар», Зарангези Латиф).-27-уми декабри соли ҷорӣ дар Маҷмааи давлатии «Кохи Борбад» даври ҷамъбастӣ ва консерти пуршукӯҳи  ғолибони озмуни ҷумҳуриявии «Суруди сол» баргузор мегардад.
Чорабинии мазкур бо ибтикор ва ташаббуси Вазорати фарҳанги Ҷумҳурии Тоҷикистон ва Кумитаи телевизион ва радиои назди Ҳукумати Ҷумҳурии Тоҷикистон имсол дар шаклу пешниҳоди нав доир мешавад.
Тайи се моҳи охир тавассути паёмҳои СМС ва овоздиҳии кушода суруду оҳангҳо ва овозхонҳои беҳтарини соли сипаришуда муайян гардиданд.
Дар натиҷа ба даври ниҳоӣ 23 овозхони шинохтаи эстрадаи муосири тоҷик роҳ ёфт.
Диплому ҷоизаҳои озмунро дар маросими бошукӯҳ ба ситораҳои эстрадаи тоҷик шахсиятҳои маъруфи ҷумҳурӣ месупоранд.
Шакли телевизионии озмуни ҷумҳуриявии «Суруди сол» дар шаби Соли нав манзури тамошобинон мешавад.