Таҳқиқоти сатҳи зиндагӣ дар Тоҷикистон

Душанбе, 12.12.2014. (АМИТ Ховар, Зарангези Латиф).- Таълимоти  пешниҳодшудаи миллии арзёбии камбизоатӣ ба таҳқиқоти буҷети хонавода (ТБХ) асос ёфта, аввалин таълимотест, ки ба кишвар тааллуқ дорад,- зикр гардид дар конфронси байналмилалӣ, ки имрӯз дар Душанбе доир гардид.
Ҳамчунин гуфта шуд, ки солҳои пеш, яъне аз соли 1999 то 2009, сатҳи камбизоатиро дар Тоҷикистон бо истифода аз таҳқиқоти сатҳи зиндагӣ дар Тоҷикистон (ТСЗТ) муайян мекарданд. Аммо ин ду воситаи арзёбӣ, яъне ТБХ ва ТСЗТ аз тарҳҳои мухталифи таҳқиқот истифода мебаранд, аз ин рӯ маълумоти ба даст омадаро наметавон муқоиса намуд.
«Талошҳои Тоҷикистон дар қабули таълимоти миллии арзёбии камбизоатӣ, ки маҳсули меҳнати чандинсолаи ҳукумат, коршиносони миллӣ, марказҳои таҳлилӣ ва дигар тарафҳои манфиатдор дар ҳамкорӣ бо Бонки ҷаҳонӣ маҳсуб меёбанд»,- гуфт мудири Бонки ҷаҳонӣ оид ба таҷрибаи камбизоатӣ дар Аврупо ва минтақаи Осиёи Марказӣ Каролина Санчез-Парамо.