Татбиқи ислоҳоти соҳаи кишоварзии Тоҷикистон

Душанбе, 11.12.2014. (АМИТ «Ховар», Фарзона Достонзода).- Бо ибтикори вазири кишоварзии Ҷумҳурии Тоҷикистон Қосим Раҳбар имрӯз, 11 декабр, дар шаҳри Душанбе бо иштироки муовини Сарвазири Ҷумҳурии Тоҷикистон Муродалӣ Алимардон ҷаласаи васеи корӣ барои татбиқи ислоҳоти аграрӣ баргузор мегардад. Тавре ки аз Вазорати кишоварзӣ ба АМИТ «Ховар» хабар доданд, барои татбиқи «Барномаи ислоҳоти аграрии соҳаи кишоварзии Ҷумҳурии Тоҷикистон барои давраи солҳои 2012 — 2020» шаш гурӯҳи корӣ аз қабили ислоҳоти аграрӣ, ислоҳоти замин, ислоҳоти бахши об, тарҳрезии механизми нав барои маблағгузории бахши аграрӣ, системаи идораи кишоварзӣ ва гурӯҳи оид ба тарҳрезии барномаи иҷтимоии деҳот таъсис ёфта буд. Дар ҷаласа якҷоя бо мушорикони бахши рушди кишоварзӣ корҳои минбаъда барои татбиқи ислоҳоти аграрӣ мавриди муҳокима қарор мегиранд.