Туҳфаҳои солинавии ДМИТ ба ниёзмандон

Душанбе, 30.12.2014.(АМИТ «Ховар», Раъно Нусратуллозода).- Ҳамасола бо фарорасии иду ҷашнҳо аз ҷониби ташкилоту муассисаҳо ба ятимону бепарасторон расонидани кумак ба ҳукми анъана даромадааст. Вобаста ба ин Донишкадаи молия ва иқтисоди Тоҷикистон ба тарбиятгирандагони мактаб-интернати ҷумҳуриявии кӯдакони шунавоиашон суст ва деркаршудаи ноҳияи Рӯдакӣ туҳфаҳои солинавӣ дар ҳаҷми 5 ҳазор сомонӣ расонид.Аз раёсати донишкада муовини ректор оид ба тарбия Лутфия Абдухолиқзода ва Хуршед Насриддинов, раиси Иттифоқи касабаи кормандон хайрияи мазкурро ба ин табақаи ниёзманди ҷомеа, ки ба лутфу навозиш эҳтиёҷ доранд, супорида, дар базми солинавии эшон иштирок ва суханронӣ намуданд.Да ҷамъомад директори мактаб-интернати мазкур Мукаррама Неъматова барои дастгирӣ изҳори миннатдорӣ карда, афзуд, ки кормандони Донишкадаи молия ва иқтисоди Тоҷикистон ҳамеша ба тарбиятгирандагони дабистон кумакҳои моддиву маънавӣ расонда, дар ғаму шодии онҳо шариканд.