Туҳфаи солинавӣ ба мактаб- интернати Ёвон

Душанбе, 18.12.2014. (АМИТ “Ховар”, Зарангези Латиф).-Вазорати кишоварзии Ҷумҳурии Тоҷикистон дар арафаи соли нави мелодии 2015 ба Мактаб-интернати ҷумҳуриявӣ барои кӯдакони ятими ноҳияи Ёвони вилояти Хатлон мошини сабукрави тамғаи “Собол” ва яхдони ҷопонии тамғаи “Шарп” ва туҳфаҳои солинавӣ кумак кард.Ба ин муносибат дирӯз дар саҳни мактаб — интернати мазкур ҷамъомади хотирмон бо иштироки муовини вазири кишоварзӣ Ҷамила Саидова, раиси ноҳияи Ёвон Амирбеки Темур, муовинони раиси ноҳия ва масъулини раёсати кишоварзии ноҳия, омӯзгорону хонандагон доир гардида, хонандагони мактаб — интернат бо барномаи фарҳангии идона хотири иштирокчиёнро шод намуданд.Ёддовар мешавем, ки дар мактаб-интернати ноҳияи Ёвон 210 нафар хонандаи ятиму бепарастор таҳсил менамояд, ки 110 нафари он дар хобгоҳ истиқомат дорад. Дар давоми 9 моҳи соли ҷорӣ аз тарафи Вазорати кишоварзии Ҷумҳурии Тоҷикистон ба мактаб-интернати мазкур ба маблағи 13000 (сенздаҳ ҳазор) сомонӣ кумаки хайрия расонида шудааст.