ВКД: Ғамхорӣ ба собиқадорон ва иштирокчиёни ҶБВ

Душанбе, 30.12.2014. (АМИТ «Ховар», Муқаддас Темурзода).-Бо кумаку ғамхорӣ ва дастгирии ҳамаҷонибаи Президенти мамлакат Эмомалӣ Раҳмон ба як гурӯҳ собиқадорони мақомоти корҳои дохилӣ ва иштирокчиёни Ҷанги Бузурги Ватанӣ дар тамоми шаҳру ноҳияҳои ҷумҳурӣ дар арафаи Соли нави мелодӣ тақдим намудани туҳфаҳои идона, аз қабили маводи ғизоӣ ва маблағи пулӣ идома дорад.
ВКД ҶТ хабар медиҳад, ки дирӯз муовинони вазири корҳои дохилӣ Умарзода Икром Ислом, Навҷувонов Абдулло Шанбиевич ва Солеҳзода Искандар Раҷаб ба хонаҳои истиқоматии собиқадорони ҷангу меҳнат: Мадулло Сафаров-старшинаи мустаъфӣ, Давлатшоҳ Қадимов- сержанти калони мустаъфӣ ва Макеев Евгений Яковлевич-подполковники мустаъфӣ рафта, ба онҳо туҳфаҳои Президенти кишварро, аз қабили: орд, равған, биринҷ,  шакар, картошка, пиёз, анвои гуногуни шириниҳо ва маблағи пулӣ расониданд.
Зимни дидорбинӣ муовинони вазири корҳои дохилӣ ин мардони наҷибу дарёдилро, ки дар айни ҳол дар ҳалқаи фарзандону наберагон давлати пирӣ меронанд, бо фарорасии Соли нави мелодӣ табрик намуда, ба онҳо барои хизмати шоён ва арзанда ба халқу Ватан изҳори сипос карданд.