Вохӯрии коршиносон дар Алмаато

Душанбе, 17.12.2014 (АМИТ «Ховар», Лайло Тоирӣ).- Дар  шаҳри Алмаатои Ҷумҳурии Қазоқистон ҳафтаи гузашта  вохӯрии нахустини коршиносони 5 кишвари Осиёи Марказӣ, Ҷумҳурии Озарбойҷон ва Федератсияи Русия доир ба таҳияи Барномаи нави Раёсати СММ оид ба маводи нашъадор ва ҷинояткорӣ барои кишварҳои Осиёи марказӣ дар чорчӯбаи Ёддошти тафоҳум оид ба ҳамкорӣ баргузор гардид.
Бино ба иттилои Агентии назорати маводи нашъаовари назди Президенти ҶТ, мақсади  вохӯрӣ- гузаронидани ҷаласа бо кишварҳо-иштирокчиёни Ёддошти тафоҳум оид ба ҳамкорӣ дар сатҳи коршиносон буд, ки бояд ситезаҳо, таҳдидҳои умумиро дар самти ҷинояткории муташаккилонаи фаромиллӣ ва муомилоти ғайриқонунии маводи мухаддир муайян ва оид ба таҳкими ҳамкории минтақавӣ дар соҳаи назорати маводи нашъадор тадбирҳои ҷавобӣ андешида шаванд.
Аз ҷониби Тоҷикистон дар вохӯрӣ кормандони Агентии назорати маводи нашъаовари назди Президенти ҶТ, Вазорати корҳои дохилӣ, Прокуратураи генералӣ, Сарраёсати Қӯшунҳои сарҳадии КДАМ ҶТ иштирок намуданд.
Аз хадамоти матбуотии агентӣ хабар доданд, ки пас аз муҳокимарониҳо дар гурӯҳҳо аз тарафи давлатҳои иштирокчӣ лоиҳаҳаи барномаи РСММ МНҶ аз нав таҳия ва аз ҷониби ҳамаи намояндагон бо назардошти манфиатҳои кишварҳо омода гардид. Қарор қабул шуд, ки лоҳияи барномаи аз нав таҳияшуда як бори дигар тавассути вазоратҳои корҳои хориҷии кишварҳои иштирокчӣ ба давлатҳо-аъзо фиристода шавад ва бори дигар фикру мулоҳизаҳои давлатҳо гирифта шавад ва баъд аз он барои имзо ба ҷаласаи вазирони корҳои хориҷии давлатҳо-иштирокчиёни барнома, ки дар охири моҳи феврали соли 2015 дар шаҳри Ашқободи Ҷумҳурии Туркманистан баргузор мегардад, пешниҳод  шавад.