Вусъати ҳамкориҳо

 
Душанбе, 5.12.2014. (АМИТ «Ховар», Раъно Нусратуллозода).-Бо ташаббуси шуъбаи робитаҳои байналмилалӣ ва раёсати таълими Донишкадаи молия ва иқтисоди Тоҷикистон семинар-вохӯрӣ бо иштироки устодони донишкада ва намояндагони донишгоҳи Севилияи Испания- сардори хадамоти робитаҳои байналмилалӣ Розарио Лопес, сардори шуъбаи маълумотдиҳӣ ва робитаҳои байналмилалӣ Мария Эскивел ва корманди ёрии техникӣ (тарҷумон) Рафаэл Вагнер баргузор гардид. 
Тавре ки котиби матбуоти донишкада Машҳура Абдуллоева иттилоъ дод, сараввал муовини ректор оид ба робитаҳои байналмилалӣ Баҳром Сафаров ба меҳмонон ба забони англисӣ аз тариқи доскаи электронӣ оид ба фаъолият ва сохтори донишкада маълумоти мушаххас дод.
Ҳамзамон намояндаи донишгоҳи Севилияи Испания Рафаэл Вагнер низ дар мавриди ташриф ба ДМИТ ва густариши минбаъдаи ҳамкориҳо, инчунин таърихи донишгоҳи Севилия ва фаъолияти он гуфт, ки дар оянда ҳамкории Донишгоҳи Севилияи Испания бо ДМИТ тибқи лоиҳаи «Эразмус+» ва шартномаҳои тарафайн ба роҳ монда шуда, барои мубодилаи устодону донишҷӯён шароити мусоид фароҳам меорад.