Ғолибияти дастаи Хуҷанд бар дастаи Жетису

Душанбе, 19.01.2015. (АМИТ “Ховар”, Ситораи Боймурод).- Дастаи «Хуҷанд”-и Хуҷанд дар Ҷоми «Баҳористон” дар Қайроққум ҳайати ҷавонони тими «Жетису”-и Қазоқистонро шикаст дод.
Тавре ки дар ин бора Кумитаи миллии олимпии кишвар хабар додааст, мусобиқаи футбол барои Ҷоми Ҷамъияти саҳҳоми пӯшидаи «Осоишгоҳи Баҳористон» бо ширкати шаш даста — «Истиқлол» (Душанбе), «Хайр» (Ваҳдат), «Хуҷанд» (Хуҷанд), «Эсхата» (Хуҷанд), мунтахаби ҷавонони Тоҷикистон (U-19) ва ҳайати ҷавонони «Жетису» (Талдиқӯрғон, Қазоқистон), ки ба мавсими нави футбол омодагӣ мебинанд, дар шаҳри Қайроққум идома дорад.
Гуфта мешавад, ки баъди натиҷагирии бозиҳои се даври мусобиқа «Хайр” бо 6 имтиёз пешсаф аст. «Хуҷанд”, «Истиқлол” ва тими мунтахаби ҷавонони Тоҷикистон (U-19) 5-имтиёзӣ доранд. Аз рӯи таносуби беҳтари тӯбҳо «Хуҷанд” (10-3) дар ҷойи дувум, «Истиқлол” (6-3) дар ҷойи севум ва тими мунтахаби ҷавонони Тоҷикистон (5-3) дар ҷойи чорум мебошанд. «Эсхата”  бо 3 имтиёз (7-8) дар ҷойи панҷум қарор дорад. «Жетису” (3-18) дар ҷойи шашум  мебошад.