Қайроққум: соли 2014 содироти мол 82%-ро ташкил дод

Қайроққум, 06.01.2015. (АМИТ “Ховар”,Абдуаҳад Шарифзода).-Дар соли 2014 дар шаҳри Қайроққум ҳаҷми гардиши умумии савдои хориҷӣ ба 133 миллиону 216 ҳазор доллари амрикоӣ баробар шуда, субъектҳои хоҷагидори шаҳр бо 22 кишвари хориҷӣ дуру наздик алоқаи тиҷоратӣ ба роҳ монданд, ки аз шумораи умумии савдои хориҷӣ  содироти мол 82,6%-ро ташкил дод.
Дар ин раванд ба иқтисодиёти шаҳр 160,6 миллион сомонӣ сармоя ҷалб гардид, ки 108,1 миллион сомонӣ сармояи хориҷӣ мебошад. Инчунин дар давраи ҳисоботӣ қисми нақшаи даромади буҷети шаҳрӣ 122,7% таъмин гардид. 
Тавре ки ба хабарнигори  АМИТ “Ховар”  раиси шаҳри Қайроққум Сатториён Матлуба Амонзода иттилоъ дод, дар ин замина инчунин соли сипаригардида дар миқёси шаҳр аз ҷониби соҳибкорон 7 коргоҳи хурду миёна, 33 иншооти гуногуни дорои аҳамияти иқтисодӣ, иҷтимоӣ ва фарҳангӣ мавриди баҳрабардорӣ қарор гирифта, дар раванди иҷрои “Барномаи вилоятии “соли 2014 — соли роҳҳои обод” дар қаламрави шаҳр 16 км роҳи мошингард асфалтпӯш шуда, дар 30,3 км роҳ корҳои таъмири ҷорӣ ва шағалпӯшкунӣ гузаронида шуданд.