Ҷамъбасти мусобиқаҳои варзишӣ

Душанбе, 20.01.2015. (АМИТ «Ховар», Раъно Нусратуллозода).- Бахшида ба рӯзи кормандони мақомоти гумруки Ҷумҳурии Тоҷикистон аз 10 то 17 январи соли ҷорӣ бо дастгирӣ ва ҳамкории зичи садорати Хадамоти гумрук мусобиқаҳои варзишӣ миёни кормандони Хадамоти гумруки назди Ҳукумати Ҷумҳурии Тоҷикистон, омӯзгорон ва донишҷӯёни Донишкадаи молия ва иқтисоди Тоҷикистон (ДМИТ) аз рӯи намудҳои варзиши шоҳмот, футболи хурд, тенниси рӯи миз ва волейбол барои дарёфти «Ҷоми Хадамоти гумруки назди Ҳукумати Ҷумҳурии Тоҷикистон» доир гардид.
Тавре ки сухангӯи ДМИТ Машҳура Абдуллоева  иттилоъ дод, 17 январ дар маҷмааи варзишии Кумитаи андози назди Ҳукумати Ҷумҳурии Тоҷикистон бозиҳои ниҳоӣ оид ба футболи хурд гузаронида шуда, ғолибони мусобиқа дар вазъи тантанавӣ қадрдонӣ гардиданд.
Ректори ДМИТ Ашурбой Солиев иштирокчиёни мусобиқотро барои ширкати фаъолона табрик карда, зикр намуд, ки вазифаи асосии донишҷӯёни варзишгари мо аз он иборат аст, ки вақти пурқимат, қувваю ғайрати ҷавонии хешро беҳуда масраф накарда, ҳам хуб таҳсил намоянд ва ҳам ба камолёбии варзишии хеш пайваста машғул шаванд. Аз ин рӯ, раёсати донишкада сол аз сол ба самти варзиш диққати махсус дода, ҷиҳати афзун гардонидани иншоотҳои варзишӣ, харидории мавод ва лавозимоти варзишӣ, баргузории чорабиниҳои оммавии варзишӣ пайваста кӯшиш ба харҷ медиҳанд ва баргузории ин сабқат низ далели  он аст.