203 парванда оид ба риоя накардани конуни истифодаи замин

Душанбе, 09.01.2015. (АМИТ “Ховар”, Мурод Назариён ).- Аз тарафи мақомоти прокуратураи  вилояти Хатлон  мунтазам санҷишҳо оид ба иҷрои талаботи қонунгузорӣ дар бораи самаранок ва оқилона истифода бурдани замин гузаронида мешавад. Тавре  ки ба  АМИТ  «Ховар» аз  прокуратураи вилояти Хатлон иттилоъ доданд, кор дар  ин самт нисбат ба ҳамин давраи соли пешин беҳтар гардида, бо натиҷаи 104 санҷиши гузаронида, 135  амр дода шуда, баҳри бекор намудани санадҳои ғайриқонунӣ қабулшуда 244 эътироз оварда шудааст. Тавре ки иттилоъ дода  шуд, дар бисёр ҳолатҳо   қарорҳои қабул намудаи раисони ҷамоатҳои шаҳраку деҳоти ноҳияҳои вилоят ғайриқонунӣ мебошанд. Баҳри бартараф намудани қонуншиканиҳои ошкоргардида вобаста ба истифодаи оқилонаи замин ба унвони шахсони мансабдор 108 пешниҳод ирсол гардидааст.  Ҳамзамон 780 нафар шаҳрванд ба ҷавобгарии маъмурӣ, 121 нафар ба ҷавобгарии интизомӣ ва 253 нафар ба ҷавобгарии моддӣ кашида шуда, 203 парвандаи ҷиноятӣ оғоз  шудааст.   
 Бо натиҷаи санҷиш ҳамчунин барои ғасби худсаронаи замин, тақсимоти ғайриқонунии он, хариду фурўш ва сохтмонҳои худсарона дар  заминҳои корам  парвандаҳои ҷиноятӣ оғоз шуда, барои пешбурди тафтишоти пешакӣ супурда шудаанд.