2554 медали варзишгарони хуҷандӣ дар соли 2014

Душанбе, 27.01.2015. (АМИТ «Ховар», Мавҷуда Анварӣ). -«Соли 2014 дар шаҳри Хуҷанд беш аз 15  майдончаи варзишӣ барои ҷавонону наврасон мавриди истифода қарор гирифта, якчанд майдончаи варзишии футбол, баскетбол ва волейболи назди биноҳои истиқоматӣ аз нав барқарор шуд»,-иброз намуд мудири бахши ҷавонон, варзиш ва сайёҳии мақомоти иҷроияи ҳокимияти давлатии шаҳри Хуҷанд Бахтиёр Исматҷонов зимни ҷамъбасти натиҷаҳои фаъолият дар соли 2014. 
Тибқи иттилои мудири бахш варзишгарони шаҳр дар мусобиқаҳои мухталифи вилоятӣ, ҷумҳуриявӣ ва байналмилалӣ иштирок карда, ба натиҷаҳои назаррас ноил шуданд. Аз ҷумла, варзишгарони шаҳр соли 2014-ум 2554 медал, аз ҷумла 906 медали тилло, 778 нуқра ва 870 медали биринҷиро соҳиб шуданд, ки ин дастоварди хуби ҷавонони ин минтақа мебошад.