55 миллион сомонӣ барои пардохти нафақа ва кумакпулиҳо

 
  Душанбе, 12.01.2015. (АМИТ Ховар, Раъно Нусратуллозода).-Имрӯз дар Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон оид ба фаъолияти солонаи агентӣ нишасти матбуотӣ доир гардид. Дар нишаст муовини аввали директори  Агентӣ  Назокат Одинаева зикр намуд, ки дар ин давра аз ҷониби Вазорати молияи Ҷумҳурии Тоҷикистон аз ҳисоби буҷети ҷумҳуриявӣ барои пӯшонидани касри Буҷети суғуртаи иҷтимоӣ ва нафақа 55 млн. сомонӣ ба суратҳисоби агентӣ ворид шуд, ки 100 фоизи нақшаи пешбинишударо ташкил намуда, нисбат ба соли 2013  10 млн. сомонӣ ё 22,2 фоиз зиёд мебошад ва он барои пардохти саривақтии нафақа ва кумакпулиҳо равона  шудааст. 
Талаботи пардохти нафақаву кумакпулиҳои иҷтимоӣ ва хароҷоти ҳисобии корхонаву ташкилотҳо аз ҳисоби маблағҳои андози иҷтимоӣ 1 млрд. 858,9 млн. сомониро ташкил намуд, ки нисбат ба соли 2013-ум 255,6 млн. ё 15,9 фоиз зиёд мебошад ва новобаста аз иҷро нагардидани нақшаи қисми даромади Буҷети суғуртаи иҷтимоӣ ва нафақа бо истифода аз маблағҳои мутамарказ аз рӯи реҷаи тасдиқгардида то 31 декабри соли 2014 он пурра маблағгузорӣ  шуд,- гуфт Назокат Одинаева.