897 медали варзишгарони тоҷик дар соли 2014

Душанбе, 08.01.2015. (АМИТ “Ховар”, Фарзонаи Давлат).- Дар соли 2014  варзишгарони дастаи мунтахаби Ҷумҳурии Тоҷикистон оид ба намудҳои мухталифи варзиш, ки 1510 нафарро ташкил мекунанд, дар 90 чемпионати ҷаҳон, Осиё, Ҷоми ҷаҳон “Гран При” ва мусобиқаҳои байналмилалӣ ширкат варзида, сазовори 897 медал, аз ҷумла 250 тилло, 243 нуқра ва 404 биринҷӣ гардиданд.
Тавре ки дар ин бора раиси Кумитаи ҷавонон, варзиш ва сайёҳӣ зимни ҳисоботи яксолаи кумита иттилоъ дод: бори нахуст аз 2-юм то 11-уми августи соли 2014 дар шаҳри Душанбе чемпионати ҷаҳон оид ба таэквандо (ITF) бо иштироки беш аз 600 варзишгар аз 52 кишвар дар сатҳи баланд баргузор гардид. Дар ин чемпионат Тоҷикистон баъди Корея ва Русия ҷойи сеюмро бо ба даст овардани 35 медал соҳиб гардид.