Афзоиши молу маҳсулот дар соҳаи матлубот

 
Душанбе, 16.01.2015. (АМИТ «Ховар», Бекназари Абӯбакр). — Корхонаҳои истеҳсолии соҳаи матлубот дар давоми соли 2014 ба маблағи зиёда аз 25 миллион сомонӣ молу маҳсулот истеҳсол карданд, ки нисбат ба соли 2013 ба қадри 3,5 миллион сомонӣ зиёд мебошад. Дар ин бора имрӯз зимни нишасти матбуотӣ муовини раиси Раёсати Иттифоқи «Тоҷикматлубот» Гулнора Кокова иттилоъ дод. 
Вай афзуд, ки аз ҷумла молҳои хӯрокворӣ ба маблағи 24 миллион сомонӣ истеҳсол гардида, ҳаҷми истеҳсоли консерва ба 8,4 миллион қуттии шартӣ расонида шуд, ки нисбат ба соли 2013-ум 1 миллион қуттии шартӣ зиёд аст. 
«Дар бозорҳои соҳа, дар соли ҳисоботӣ, маблағи пардохти доимии яквақта 10,9 миллион сомониро ташкил дода, хизматрасонии пулакӣ ба аҳолӣ ба 5,3 миллион сомонӣ расонида шуд. Ин нишондиҳандаҳо нисбат ба соли 2013 мутаносибан 88 ҳазор сомонӣ ва 812 ҳазор сомонӣ зиёд мебошад», тазаккур дод Г. Кокова.