Афзоиши сармояи хориҷӣ

Душанбе, 27.01.2015. (АМИТ «Ховар», Бекназари Абӯбакр). — Воридоти сармояи хориҷӣ ба Тоҷикистон дар соли 2014 нисбат ба соли 2013-ум 212,2 миллион доллари ИМА зиёд гаштааст. Дар ин бора имрӯз зимни нишасти матбуотӣ раиси Кумитаи давлатии сармоягузорӣ ва идораи амволи давлатӣ Қодири Қосим иттилоъ дод. 
Вай илова намуд, ки аз ҷумла сармоягузории мустақим 78,7 миллион доллари амрикоӣ, дигар намуди сармоягузориҳо 132,7 миллион доллари амрикоӣ ва сармоягузории портфелӣ 816,8  ҳазор доллари амрикоӣ афзоиш ёфтааст. 
«Сармояи мустақими хориҷӣ ба соҳаҳои омӯзиши геологӣ ва истихроҷи канданиҳои фоиданок — 135 млн. доллари ИМА, энергетика — 60 млн. доллари ИМА, алоқа — 34,5 млн. доллари ИМА, сохтмон — 22 млн. доллари ИМА, хизматрасонии молиявӣ — 21 млн. доллари ИМА, саноат — 4,6 млн. доллари ИМА, саноати сохтмонӣ — 4 млн. доллари ИМА, саноати хӯрокӣ — 3 млн. доллари ИМА, кишоварзӣ — 2,4 млн. доллари ИМА, савдо 2 млн. доллари ИМА ва дигар соҳаҳо 1 млн. доллари ИМА равона гаштааст», — зикр намуд Қ.Қосим.