Афзоиши ташкилотҳои қарзӣ дар ҷумҳурӣ

Душанбе, 20.01.2015 (АМИТ «Ховар», Фарзонаи Давлат).- Шумораи ташкилотҳои қарзӣ дар соли гузашта 138 ададро ташкил намуд, ки нисбат ба соли 2013 шумораи бонкҳо 1 адад ва филиалҳои онҳо 17 адад зиёд гардидааст,-зикр кард имрӯз зимни нишасти матбуотӣ раиси Бонки миллии Тоҷикистон Абдуҷаббор Ширинов.
Бино ба ҳисоботи солонаи Бонки миллии Тоҷикистон дар давоми сол 17 бонк, 120 ташкилоти маблағгузории хурд, 1 ташкилоти қарзии ғайрибонкӣ ва 344 филиали бонкҳо ташкил ва ба фаъолият пардохт. Ҳамчунин дар миқёси ҷумҳурӣ дар соли 2014  1539 адад нуқтаи мубодилаи асъори ташкилотҳои қарзӣ ва  шахсони воқеӣ ба қайд гирифта шудааст, ки дар муқоиса ба аввали сол 115 адад зиёд мебошад.  Аз ин нуқтаҳо 645 адад ба шаҳри Душанбе, 424 адад ба вилояти Суғд, 204 адад ба вилояти Хатлон, 40 адад ба вилояти МКБ ва 226 адад ба ноҳияҳои тобеи марказ рост меоянд,-иттилоъ дода шуд дар нишасти хабарии Бонки миллии Тоҷикистон.