Андозсупорандагони беҳтарини соли 2014

Душанбе, 16.01.2015 (АМИТ «Ховар», Фарзонаи Давлат).-Кумитаи андози назди Ҳукумати Ҷумҳурии Тоҷикистон бо мақсади ҳавасманд ва руҳбаланд кардани андозсупорандагон, баланд бардоштани сатҳи фарҳанги андозсупории онҳо ҳар сол дар ҷамъбасти соли андоз беҳтарин андозсупорандаи солро интихоб менамояд.
  Бо ин мақсад дар Кумитаи андози назди Ҳукумати Ҷумҳурии Тоҷикистон комиссия таъсис дода шудааст, ки он нишондиҳандаҳои субъектҳои хоҷагидорро аз рўи меъёрҳо омўхта, беҳтарин андозсупорандагони солро муайян менамоянд.
 Дар маҷмӯъ барои муайян намудани беҳтарин андозсупорандагони сол меъёрҳои зерин ба инобат гирифта мешаванд: ҳиссаи андозҳои ҳисоб ва пардохтшуда дар ҳаҷми даромади умумии андозсупоранда, шумораи кормандони кироя ва фонди музди меҳнат дар соҳаи фаъолият, дар муҳлатҳои муқарраршуда пешниҳод намудани эъломияҳои андоз, дуруст ҳособ намудан ва дар муҳлатҳои муқарраршуда пардохт намудани андозҳо, нисбат ба соли гузашта зиёд намудани ҳаҷми маблағи андозҳои ҳисоб ва пардохтшуда, роҳ надодан ба қонунвайронкунии андоз ва зоҳир намудани масъулияти баланди андозсупорӣ.
          Бино ба иттилои кумитаи мазкур дар асоси омўзиши нишондиҳандаҳо комиссия ба хулоса омад, ки дар соли 2014 ба унвони баланди «Андозсупорандаи беҳтарини сол» субъектҳои хоҷагидори зерин: 
Ҷамъияти дорои масъулияти маҳдуди «Хуаксин Ғаюр Семент» аз ноҳияи Ёвон, Ҷамъияти дорои масъулияти маҳдуди «Таком» аз шаҳри Душанбе, Ҷамъияти дорои масъулияти маҳдуди «Фабрикаи шири Саодат» аз шаҳри Душанбе, Ҷамъияти саҳҳомии пўшидаи «Туризм Промоушн Сервисез Таджикистан» аз шаҳри Душанбе, Ҷамъияти дорои масъулияти маҳдуди «Баҳористон» аз шаҳри Қайроққум сазовор дониста шаванд.