Ба таваҷҷуҳи шаҳрвандони Ҷумҳурии Тоҷикистон

Душанбе, 03.01.2015 (АМИТ «Ховар»).- Вазорати корҳои хориҷии Ҷумҳурии Тоҷикистон ба таваҷҷуҳи шаҳрвандони Ҷумҳурии Тоҷикистон, ки нияти сафар ба Федератсияи Россияро доранд, мерасонад, ки аз 1 январи соли 2015 вуруд, иқомат ва гузашти транзитӣ аз қаламрави Федератсияи Россия танҳо бо шиносномаҳои хориҷӣ сурат мегирад. Инчунин шахсони ноболиғ, ки ҳамроҳи волидайн ва намояндагони қонунии хеш ба Россия сафар доранд, бояд шиносномаҳои хориҷӣ дошта бошанд.Тибқи ёддошти расмии Вазорати корҳои хориҷии Федератсияи Россия шаҳрвандони Ҷумҳурии Тоҷикистон, ки то 1 январи соли 2015 ба қаламрави Федератсияи Россия бо шиносномаи шаҳрванди Ҷумҳурии Тоҷикистон (шиносномаи дохилӣ) ворид шудаанд, ҳуқуқҳояшон барои муроҷиат ба мақомоти минтақавии Хадамоти федералии муҳоҷирати Федератсияи Россия барои барасмият даровардани ҳуҷҷатҳои зарурӣ ё тамдид намудани будубоши қонуниашон маҳдуд карда намешаванд. Барои чунин категорияи шаҳрвандон тарк кардани қаламрави Федератсияи Россия ба сабаби надоштани шиносномаи хориҷӣ пешбинӣ нашудааст.Шаҳрвандоне, ки дар қаламрави Россия бо шиносномаи шаҳрванди Ҷумҳурии Тоҷикистон (шиносномаи миллӣ) қарор доранд, метавонанд барои гирифтани шиносномаи хориҷӣ ба намояндагии дипломатӣ ва муассисаҳои консулии Ҷумҳурии Тоҷикистон дар Федератсияи Россия ба суроғаҳои зерин муроҷиат намоянд:1) Хадамоти консулии Сафорати Ҷумҳурии Тоҷикистон дар Федератсияи Россия, шаҳри Москва, паскӯчаи Скатертный 19;2) Консулгарии генералии Ҷумҳурии Тоҷикистон дар шаҳри Уфа, кӯчаи Цурюпы 149;3) Консулгарии генералии Ҷумҳурии Тоҷикистон дар шаҳри Екатеринбург, кӯчаи Гражданская д. 2 литер “А”;4) Нуқтаи маълумотҷамкунӣ дар шаҳри Санкт-Петербург, гузаргоҳи Фонарный, хонаи 3;5) Нуқтаи маълумотҷамъкунӣ дар шаҳри Краснодар, кӯчаи 40-лет Победы 94.