Баррасии зиёда аз 6000 парванда аз ҷониби Суди олӣ

Душанбе, 12.01.2015. (АМИТ «Ховар», Муқаддас Темурзода).-«Соли сипаригардида дар марҳилаҳои гуногуни судӣ дар маҷмӯъ 6337 парванда ва дархосту пешниҳодҳо мавриди омӯзиш ва баррасӣ қарор гирифтанд», -изҳор дошт раиси Суди олии Ҷумҳурии Тоҷикистон Нусратулло Абдуллозода имрӯз зимни нишасти матбуотӣ ба хабарнигорон.
Н. Абдуллозода ҳамчунин зикр намуд, ки дар марҳилаи якум 128 парвандаи гражданӣ, оилавӣ, ҷиноятӣ ва дархосту пешниҳодҳо баррасӣ гардиданд, ки 46 ададашро парвандаҳои ҷиноятӣ, 13-тоашро  гражданӣ, 6-то оилавӣ, 47 ариза оид ба барқарор намудани муҳлати мурофиавӣ ва 16 -тои дигарашро дархосту пешниҳодҳо ташкил доданд.
«Бояд зикр намуд, ки аз 46 парвандаи ҷиноятии баррасишуда 43-тоаш нисбат ба 81 нафар бо баровардани ҳукми айбдоркунӣ анҷом ёфта, пешбурди 1 адад нисбат ба 2 судшаванда бинобар фавташон ва 2 парванда нисбат ба 2 нафар бинобар аз айбдоркунӣ даст кашидани айбдоркунандагони давлатӣ қатъ гардиданд», -афзуд раиси Суди олӣ.