Бастани беш аз 1 млн шартномаи суғуртавӣ дар як сол

Душанбе, 30.01.2015. (АМИТ«Ховар», Фотима Қувватова)- Имрӯз дар  КВД «Тоҷиксуғурта» зимни нишасти матбуотӣ раиси корхона  Аловуддин Сатторов  иброз дошт, ки дар соли 2014  «Тоҷиксуғурта»  оид ба фарогирии объектҳо бо хизмати суғуртавӣ миқдори бастани шартномаҳои суғуртавиро ба 1 миллиону 388 ҳазору 129 адад расонид, ки дар муқоиса ба соли 2013  4 ҳазору 500 шартнома зиёд аст.
Аз ҷумла, ба буҷети ҷумҳурӣ оид ба ҳамаи намудҳои андоз ва пардохтҳо 25 миллиону 556 ҳазор  сомонӣ маблағ пардохт шуд, ки аз ин 17 миллиону 290 ҳазор сомонӣ аз ҳисоби 70 фоизи бақияи суғуртаи намудҳои ҳатмӣ ва 8 миллиону 266 ҳазор сомонӣ аз ҳисоби дигар намудҳои андоз буда, нисбат ба соли 2013 657 ҳазор сомонӣ ё 2,6 фоиз зиёдтар мебошад.
Инчунин соли гузашта корхона бо Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон ҷиҳати ба суғурта фаро гирифтани 6000 нафар шаҳрванди ба Ҳаҷ сафаркунанда шартнома ба имзо расонид, ки аз ин ҳисоб 360 ҳазор сомонӣ ҳаққи суғуртавӣ ворид гардид.